Presidenti i Rusisë Vladimir Putin ka theksuar se vazhdon bashkëpunimi në fushën ushtarako-teknike midis Venezuelës dhe vendit të tij, transmeton Anadolu Agency (AA).

“Bashkëpunimi ynë ushtarako-teknik vazhdon. Ky bashkëpunim ka të bëjë kryesisht me përgjegjësitë e Rusisë. Në kuadër të bashkëpunimit tonë, po përparojnë sipas kalendarit punimet për ndërtimin e qendrave të mirëmbajtjes dhe sigurimit të pjesëve rezervë të pajisjeve ushtarake ruse në Venezuelë”, deklaroi Putin, i cili priti në një takim në Moskë presidentin e Venezuelës Nicolas Maduro.

“Rusia mbështet në Venezuelë vazhdimisht të gjitha qeveritë legjitime. Po ashtu mbështesim kategorikisht edhe bisedimet e zhvilluara me opozitën. Refuzimi i këtyre bisedimeve është i palogjikshëm. Ne këto i llogarisim si gjëra që përbëjnë dëm ndaj vendit dhe kërcënim kundrejt mirëqenies së popullatës”, tha Putin në pjesën e takimit të hapur për mediat.

Ndërkaq, në lidhje me tregëtinë mes dy vendeve, Putin tha se në muajt e fundit ajo është rritur për 10 për qind.

“Ne besojmë se kjo është e rëndësishme kur kemi parasysh situatën e vështirë në të cilën ndodhet Venezuela për shkak të presioneve. Bashkëpunimin midis nesh mund ta vlerësojmë edhe si një bashkëpunim humanitar”, shtoi Putin.

Duke njoftuar se kanë planifikuar që së shpejti Venezuelës t’i japin 1,5 milionë doza të vaksinave të gripit, Putin deklaroi se “Këtë sasi mund ta rritim në pesë milionë pas një kohe. Përveç kësaj, do të vihen në zbatim projektet tona të mëdha, kryesisht ato në sektorin e energjisë. Rusia deri më sot ka investuar katër miliardë dollarë në ekonominë e Venezuelës”.

Nga ana tjetër, presidenti i Venezuelës, Nicolas Maduro, tha se është një kënaqësi e madhe që ndodhet në Moskë.

“Duke vlerësuar hapat që kemi ndërmarrë këtë vit, ne do të mund të bëjmë planet lidhur me të ardhmen duke identifikuar se çfarë problemesh ekzistojnë akoma dhe se çfarë përparimesh janë siguruar”, theksoi Maduro.